Startseite -> Index

Mostrich Thiele

Mostrich Thiele wohne in Lutter un manchet mal ok in Wolwenbüttel inn' Kittchen. Hai konne orrentlich einen verdragen un am meisten supe hai, wenn hai nassauern konne.

Einmal, wie e' noch jung was, deine in Glentdörp. As ne dä Buer nu mal en bettchen ranner nehmen wolle, meine Mostrich, hai solle ne ja in Rauhe laten, hai wörre ja en richtigen Urangutan.

Dä Buersmann was sau wütend opp Mostrich, datte ne glikst ruter e'smetten hat. Hai hattet ok in Lutter annzeiget.

Wie se nu vorren Amtsrichter stahen däen, unne Bure fragt wörre, wat Mostrich denne sejt harre, anneworre dä Bure:

"Herr Amtsgericht, Mostrich hatte sejjt ick wörre en Urangtangtang"

"Wat", sejje dä Richter, "en Urangtangtang? - Dat staiht ja noch niche mal innen Wörterbauk! - Dat is keine Beleidigung, en Wort, wat da nich drinne staiht, dat gift et nich" - un Mostrich wörre frie e'sproken.

Einet Dages harren se ne awer doche krejen. Mostrich harre watte klaut un kaime na Wolwenbüttel int' Kittchen. Da hatte sick awer sau gaut e'führet, datte Kalfaktor wörren was.

Wie hai nu wedder ruter solle, was Mostrich sehr traurig. Hai meine taun Wärter, se sullen man seine Stewwel gar nich erst weg stellen, hai kaime doch balle wäer. Saun schönet eten, un immer ne warme Stube, da bruke man sick ja vorr nist tau sorgen.

Wie et nu Harwest wörre, unne Winter vorre Dör stund, da harre Mostrich grote Sorgen. Hai draip en' Burjemester e'mal oppe Westernstrate un harre ok en lüttjen hinne e' Binde kippet.

Wie hai nu anne dran is, kieke ne dä Burjemester grot an, hai was fräuer en hojen Offizier e'west, un meine:

"Na Thiele, Sie können wohl auch nicht grüßen?". - Da was Mostrich sau wütend, datte en' Burjemester eine runnerhauen hat, midden oppe Strate.

Dat leiten dä sick awer nich e'fallen, hai zeije Mostrich an, un dä moste wedder inn' Kahn. Wie dä Richter nu den armen Sünder fraug, oppe noch war tau sejjen härre, meine Mostrich:

"Herr Amtsrichter, jie hatt woll dit Jahr nich veel Kartuffeln ne'eert, dat je mick nur saune kurte Tied innesperren lat?"

Einmal salle Mostrich Bon'n lejjen, et was ne extar gue un düre Sorte anneschaffet. Wie nu dä Bon'n gar nich komen wüllt, un inne Midde von Stücke saun Hupen Bon'n dorchenanner rutekomt, frächt man Mostrich, watte maket härre, hai anneworre: wat soll ick denne sau veel Arbeit maken, ick hewwe inne Midde en Lock e'maket, un da hewwe ick alle rinner smetten.

Carl Apel, oppe Nienstrate harre en Kopladen, hai kellneriere oppe Dörper un so, einmal trifft hai Mostrichen, dä is niegierich un frächt:

"Na Carl, wo kümest du denne her?", meint Apel:
"Ick kome von Riesebarg un hewwe Mostrich e'holt". - sejjet, un leip watte kunne davon. Mostrich was wütend, dat Carl Apel ne sau taun Besten holt harre.

Altvater Gustav Lochte, Frl. Klopp, Hermann Behrens u.a.