Startseite -> Index

H A R W E S T

Et is Harwest! - Dä Kastanien fallt vonne Böme,
un dä Blädder farbet sick bunt. Ower dä Felder
strieket dä Wind, un dä Kartoffelfüer brennt bett
inne Nacht rinner. Jetzt ward ok oppen Felle dä
Räuwe e'roet. Alle Hänne weert e bruket un dä
Fabrikschornstiene qualmet, unne Räuwewagen
feuert vullbeladen dorche Straten nae Zuckerfabrike henn.

Dustere Wolken staht an Hewen; Regenschuer
owerfallt einen unverhofft, wennen butten en bettchen
rummer lopen dait. Dä Dage sünt all bannig kort,
un et ward all fräu duster. Et is all wäer sau
wiet, dat Mudder en Owen anbeuten dait, un allet
froh is, wenn' sick Awens inne warme Stube setten kann.

Vader snippelt midde Lütjen ut Späne, Kastanien
un Eicheln lüttie Männeken, dä se denne oppen
Sekretär stellen daut. Dä Katte snurrt inne Sofaecke,
unne Owen bullert. Grotmudder vertellt de
Geschichten ut öhrer Kinnertied, unne Wind rappelt
anne Teilen, un butten hult en Köter - feern
un lang.

Et ist Harwest, un et duert nich mehr lange, unne
Winter staht vorre Dör ...

Heinz-Bruno Krieger