Startseite -> Erzählungen -> Dä ole Steinmetz dait Abbidde

Mien Grotvader, dä ole Fritze Schmudde in Ossendörp wörre Gemeindediener, Nachtwächter un Gäusehirte in einer Person. Dä Gäuse wörren oppen Masch, da, wo hüte dä Sportplatz in' Dörpe is, von Fritze Schmudde e'hött, un maistens hülpen hierbie seine Kinners.

"Wie mosten ok opper Masch Feddern sammeln, un wehe, wenn wie det Awends keine e'hat het" - vertelle miene Mudder us Kinner, wenn se von öhre Kindertied vertelle.

Einet Awends nun konnen dä Kinder bien na Huse driewen, dä Gäuse nich mehr bändigen. Sai lopen alle hope oppe Strate ropper, un utgerechnet von August Steinmetz, dä bie dä Möhle, naer Glüsig tau wohne, wörre ein Gander opper Strate dot e'feuert. Dä ole Steinmetz, dä dat taufellig e'saihn harre snappe sick sienen Gander, nam ne mid in sein Hus un hadde ne mit siener Frau oppegätten.

Awer, dat is nu dä grote Gemeinhait e'west, hai verlange von mienen Grotvader Fritze Schmudde, dat dä dä Gaus full betahlen solle, wo hai nu wirklich nist datau kunne, dat dä Gander ower e'feuert wörre. Use Grotvader moste denne ok dä Gaus vull betahlen.

Daröwwer wörren nun veele Jahre vergahn. In Dörpe vertelle man sick, dat dä ole August Steinmetz in Starwen lijje.

Da fung oppen mal - uter dä Reje - use grote Regelator an tau bimmeln; wie wörren alle bannig vor Angest, un keken us ratlos an. Da oppenmal segge Grotmudder, dä aine gaue un fromme Frau was, tau öhren Mann unne Kinners:

"Da maket jüch man nist darut, dat is dä ole Steinmetz, dä liejet in Starwen un kann nich von hinne komen. Hai dait jetzt Abbidde wejen dä Gaus, dä wie dunnemals tau unrecht bie öhne betahlen mosten."

nach Heinz-Bruno Krieger
Erzählt 1987 von Frau Irmgard Loock, geb. Köter, Ochsendorf. Sie hörte diese Geschichte oft von ihrer Mutter Auguste Köter, geb. Schmudde