Startseite -> Erzählungen -> Sien schönstet Wiehnachtsjeschenk

Ne ole Wiehnachts-Vertellje, dä sick tauedragen hat! ...

Et heite Lisa, un et harre ganz grote, blaue Oogen, un lange, blonne Zöppe, dä sei in' oppen Koppe tausammen e'knütt harre.

Se was ne lüttje Säute, un stamme ut Lauig, wo öhre Öldern wohnen däen. Wenn se mal na Lutter kam', um hier vorre Mudders intauköpen, dann kekke se immer sau unschuldig inne Weltjeschichte rinner, un make so, as opp se et garnich merken dä, wie dä lutterschen Bengels hinner sei herkekken.

Dabie was se ne lüttje, dralle Deern, un harre dä Rundungen ewen einfach da, wo se bie sau ahn junget Mäken von fofta oer seßtein Jahren ewen nenne hören däen.

Hei was en lutterscher Junge. Watt schall ick jüch ower öhne veel vertellen ?

Schon ganz fräuh, sau lange, wie tau rüjje denken künne, harren ne Vadder un Mudder midde nomen, wenn se na Lauig henne gahn wörren. Dann harren ohne dä Öldern bie Bäcker Friedrich in Lauig, en Back e'kopet un bie Nienstedt oppen Stowenbrinke, kreje en' Glas Melk, oer wie ölder was, en Glas Malzbeier.

Untälige male wasse so en Lutterstieg runner, na Lauig henne gahn. Immer keeke naen Ränzelsbarg ropper, oppe nich mal einen vonner Unnerirdischen, oer König Ränzel sülwest tau seihn kreeje. Awer et schülle woll sau sien, wie dä olen Lüe et sick vertellen däen, dä Twarje vonn' Ränzelsbarje wörren all vorr veelen Jahren von hier wejje trecket, un nu was keiner mehr von dä lüttjen Lüe da.

Wie hei grötter e'worren was, da harre hei sick genau sau, wie alle annern Jungen ok, inne Lauingsche Dragoner-Kuhle midde Lutterschen und Lauingschen rummer e'knüppelt. Düsset Hithack harren schon dä Olen sau tau öhrer Tied e'drewen, un sau wörret woll schon immer e'wert sien.

Ja, wat schall ick jüch sonst woll noch veel von öhne vertelln? Nur datt noch, datte schon als Junge Lisan ut Lauig in sien Hart e'sloten harre, un datte sonst en brawn un gauen Junge was.

Nu was et einen Dag vorr hillig Awend!

Ja, wenn ick jüsch datt genaue Jahr sejjen soll, dann mott ick löjjen. Et mott of jeen Fall sau ower veertig bewtt foftig Jahr her sien. Dä ganze Welt was deib verschneit, un et snie, un snie immer wieder.

Dä ole Harksche schüddele öhre Bedden, un dä Snieflocken fallen von' Hewen runner, datt man garnich wiet kieken konne.

Wat was datte awer ok vorne Pracht un vorne Fräue vorre Jugend! Dä Slitten wörren here kreejen und Old und Jung trecke na en Elme ropper, um hier tau slickern und tau glissecken.

Wie hei nu noch mal dorche Straten gaht, wat sah hei da? - Da gung dä lüttje Lisa ut Lauig dä Strate lang. Sei harre in beien Hännen grote un lüttje Pakete, un ne sware, grote Dasche, moste sei ok noch midde slepen.

Ach datt was ja furchtbar, datt gung doch woll einfach nich. Un wie se öhne nu saun leiwen, truen Blick tau worfen dä, da fasse sicken Hart, gung snell hinner Lisan her, un ohne vell tau fragen, nahm hei öhre sware Dasche, un noch en' Paket, un draug et öhr einfach.

Hei was in düssen Moment dä glücklichste Minsche, dän man sick sau vorrstellen konne. Ick wett nich, et is all veel tau lange her, wat sick dä beien junken Minschenskinners in düssen Minuten vertellt hät.

Einet weit ick awer, datt sei garnich e'merkt hät, wie dä Tied vergungen was, un wie dä Wind dä Snieflocken umse rummer wirbeln dä.

Sei harre ganz roe Backen, un hei ne ganze roe Näse. Et gaff ok sau veel tau vertellen, un hei moste sau in sienen Koppe feststellen, datt et awer ok en tau leiwet, un tau säutet Mäken wörre.

Datt Kalkwerk, un dä lange, grae Strecke, lag' all längst hinner se'. Butten was et all stockduster un et snie, et snie, wat von' Hewen runner wolle.

Da oppen mal, - man konne dä ersten Lichter von Lauig all seihn, blew Lisan stahn. Sei sette öhre Pakete in Snie - un eh hei sick sau richtig verseien kunne, gaff sei öhne en Kuss, midden oppen Mund ropper, saun ganzen, lüttjen, un saun ganzen zarten ...

Et was wien Hauch, un hei dachte, in düssen Oogenblick, bliewe dä Tied stahn ...

Wie hei weer richt tau Besinnung kaime, da was Lisa weg. - Hei stund alleene da un dä ole Hark'sche schüddele öhre Bedden, datt dä Snie man nur sau runner fleijen dä. Den Weg na Huse isse ganz langsam dorchen hohen Snie e'gahn.

Awer hei meine noch, na all dä veelen, veelen Jahre, dä seit dunnemals dahin e'gahn sünd, datt dütt sien schönstet Wiehnachtsjeschenk e'west ist, datt hei in sienen Lewen e'schenket bekomen hat.

Heinz-Bruno Krieger 1974